– God samferdsle er grunnlaget for at det kan, og skal bu folk i distrikta

Lesarbrev: Val av ferjetrasé

Eit utval politikarar frå Kvinnherad og Stord er i ferd med å bestemme kva fergeleie mellom dei to kommune ein skal gå inn for. Avgjersla vil ha stor betydning for bedrifter og innbyggjarane i Kvinnherad som lenge har etterlyst betre samferdsel inn og ut av kommunen. Det vil knyta Sunnhordland tettare saman, samt at vegen til byane med ulike tilbod og arbeidsmarknad vil bli korta ned. Dette er noko som har vert oppe til debatt i lengre tid, og politikarane har sagt det står øvst på dagsordenen.

«God samferdsle er grunnlaget for at det kan, og skal bu folk i distrikta» står som første punkt på orienteringa frå ordføraren vår til kommande kommunestyremøte. I dag ligg Kvinnherad i ein utkant og fråflyttinga akselererer jamt saman med forgubbinga for kvart år som går, og dette er trulig ordføraren bekymra for. I lokalavisene har det i nyare tid blitt lagt fram statistikk utarbeidd på vegne av kommunen, som viser ein tydelig trend at det blir færre ungar i kvart kull i barnehage og skule. Den største gruppa av befolkninga er mellom 55-65 år. Verst råka er ytterkantane av kommunen.

Folk vil ha nærleik til ulike fritidstilbod, butikkar, gode tenester og ein arbeidsplass som har brukt for den kompetansen dei har tileigna seg. Fleire ungar ønsker å gå på ein skule der det er fleire jamaldrande i same klasse. Dette ser ein igjen over heile landet og skal Kvinnherad ha eit håp om å oppretthalda befolkningstalet og være eit alternativ for unge, så må ein erkjenna at folk kjem til å ha eit anna busettingsmønster og krav enn tidligare. Det er derfor svært viktig for heile Kvinnherad at nytt ferjestø mot Stord med planlagt utbetring av ferjefri E39 ligg nært dei fleste som bur i kommunen.

Norske bruer treng vedlikehald på opptil 19 milliardar kroner og på Vestlandet skal 150 tunnelar rustast opp dei neste åra, samt at Hordaland fylke må bruka 600 millionar i året på ferjetransport i frå 2020 (ei dobling frå 2017). Det er planlagt nye store samferdselsprosjekt i heile landet, som kjem til å bli ein stor utgiftspost for samfunnet og det vil bli sett med lupe på alle prosjekta. Samtidig med dette bruker Kvinnherad kommune store summar og tusenvis av timar på å få realisert bru til Fjellberg. Det kan og synast som at det er eit reelt alternativ å gå inn for å bygge nytt ferjestø ved Klosterneset på Halsnøy, ein ytterkant i kommunen vår. Dette er tiltak som vil kosta fylket/samfunnet godt over 2 milliardar når ein tek med utbetring av veg og infrastruktur (i ytterkantane av utkanten Kvinnherad).

Eit argument for å ha eit nytt ferjestø på Halsnøy er at fylket har inngått ein 10-årskontrakt med Fjord 1 som skal bruka elektriske ferjer der det er fordel med kort overfart på grunn av redusert fart og ladetid. Det er 10-12 minutt lengre seglingstid til Sunde ferjekai, som kan utbetrast med minimale kostnader, og reisetida mellom Husnes/Rosendal og Lervik vil være tilnærma lik uansett kva alternativ ein går for. Eit moment for at nye samtalar om ferjestø mellom Kvinnherad og Stord var auka ferdsel og handel gjennom kommunegrensene, og det er underforstått at det inneber meir trafikk. Ein må ta omsyn til vegstandard, trafikktryggleik, kostnadar og reisetid i regionen.

Sunde ligg innanfor 20 min kjøretid til ca. 65% av kommunens befolkning og derifrå burde ein kunna reisa med hyppige bussavgangar mellom Sunde, Sæbøvik og Rosendal. Hovudaksen der kommunen har sagt busetnadsmønsteret vil vera i framtida. Betre tilbod kan føra til at fleire kan bu i Kvinnherad og jobba i nabokommunane, og me får mindre privatbilisme. Samfunnet kan ikkje bruka store summar på eit tiltak som ikkje vil påverka reisetida ut av kommunen for andre en ein liten prosentdel. At Hydro skal starte opp at B-hallen på Husnes er ein gladnyheit, men skal trenden med fråflytting og forgubbing snu må me bruke tid og pengar på dei gode infrastrukturprosjekta som vil betra situasjonen for heile kommunen. Bruk Sunde ferjekai som det billigaste og beste alternativet fram til den nye traseen mot E39/Bergen blir eit alternativ.

God samferdsle er grunnlaget for at det kan, og skal bu folk i distrikta.

 

Av:

Mats Mo (Ingeniørstudent Bergen) Sunde.

Stian Sundal (Prosessoperatør Hydro) Sunde.

Espen Åkra (Sjukepleier) Dimmelsvik.

Tore Opsanger (Sjukepleier Bergen) Sunde.

Vegard Enes Ludvigsen (Styrmann) Rosendal.

Peder Feet Kaldestad (Industrimekanikar BKS) Husnes.

Aleksander Espevik (Nautikkstudent Haugesund) Husnes.

Jostein Arnesen (Sivilingeniør Trondheim) Husnes.

Eirik Fykse (Bygningsingeniør Oslo) Husnes.

Tommy Skarveland (Prosessoperatør Hydro) Husnes.

Rune Åsheim Mo (Student Bergen) Sunde.

Lasse Digranes (Økonom Bergen) Husnes.

Johnny Furdal (Fotballspelar Bergen) Omvikdalen.

Sigurd Guddal (sivilingeniør) Rosendal.

 

[gravityform id="11" title="true" description="true"]