God start på året for Hydro

Med rekordsterk drift og overskot på 43 millionar kroner før renter og skatt, har Hydro Husnes starta 2017 på ein god måte.

Fabrikksjef Per Øyvind Sævartveit trekkjer spesielt frem stabilt høg produksjonstakt når han summerer opp dei første tre månadane av året.

– Drifta i første kvartal i år er rekordbra. Vi har blant anna lukkast godt med oppkøyring av straumstyrken slik at produksjonsvolumet i elektrolysen har auka, samstundes som vi har klart å redusera utetida på elektrolyseceller som er ute for omfôring. Held vi fram i denne takten ser 2017 positivt ut, melder Sævartveit.

Den globale prisen på aluminium auka gjennom kvartalet, og saman med framleis svak krone samanlikna med dollar, bidrog dette positivt i rekneskapet til Hydro Husnes. Den positive priseffekten vart delvis oppvegd av auka råvarekostnader samanlikna med førre kvartal.

– Støyperiet leverer for tida godt på alle parameter, og vi får gode tilbakemeldingar frå kundane våre, seier fabrikksjefen.

Han legg til at tryggleik, presisjon og produktkvalitet er naudsynte føresetnader for å lukkast i ein tøff global industri som aluminiumindustrien.

– Alle som jobbar her veit at vi framleis kan bli betre, og filosofien i produksjonssystemet vårt er at vi skal bli betre i morgon enn vi var i dag. Men dei relativt gode kvartalstala viser at organisasjonen vår gjer veldig mykje godt arbeid, seier Sævartveit.