Gravinga i gang for Lio Sag på Husnes

Før helga vart det nye bygget til Lio Sag & Treforedling stukke ut på Husnes industriområde. No er gravinga i gang, og avdelingsleiar Kristine Heimvik ser fram til betre plass i butikk og lager, og ikkje minst til at bedrifta vert meir synleg frå vegen.

– Vi har blitt tekne veldig godt i mot her på Husnes, men framleis veit ikkje alle at vi er her. Så no gler vi oss veldig til å bli ferdige, seier Heimvik.

Bedrifta som er knytt til Byggtorget har eksistert ved Løfall i mange år, og etablerte seg på Husnes i fjor. Rune Myklebust og kollegane fann snart ut at dei ville satsa stort på Husnes. Det gjekk ikkje lang tid før dei fann ut at lokala dei hadde fått der vart for små. Lio Sag kjøpte etter kvart tomta ved sida av Tess, og snart skal det reisast eit nybygg på 900 kvadrat der.

 

Graving

Denne veka byrjar gravinga for å klargjera for fundamentet til nybygget. Det vert ein hall med gjennomkøyring, slik at kundane kan køyra inn og lasta på varer før dei køyrer ut att på andre sida.

– Vi får mykje meir lagerplass enn vi har i dag, og vi får ein større butikkdel, seier Heimvik.

I dag jobbar ho saman med Joachim Grindheim Ekeland i avdelinga på Husnes.

– Eg reknar med det vert behov for fleire tilsette når vi utvidar, seier ho.