Grenda blir med til Ukraina

For eit par veker sidan vart det kjend at ordførar Vegard Bjørnevik skal vera med og køyra hjelpesending til Ukraina. Med på lasset blir også Grenda sin eigen Morten Nygård.

– Dette er noko me har snakka om i fleire år, også før krigen braut ut. Tormod (Myklebust, journ.merk.) har jo køyrt hjelpesending til Ukraina i over tjue år, og krigen har i så måte ikkje endra på verken hans eller THK-stiftinga sitt engasjement, fortel Nygård.

Aukar interessa

– Grunnen til at det ikkje har skjedd før er av praktiske årsaker. Tidlegare har dei berre køyrt éin lastebil nedover, og i og med at eg ikkje har lappen på det så hadde eg måtta køyra min eigen bil. No derimot skal SKL donera to småbilar, og det er ein av dei eg då skal køyra nedover, forklarer han vidare.

Nygård er klar på at det reint journalistisk heilt klart aukar interessa at ordføraren også skal vera med som medsjåfør.

– Eg trur det kan bli veldig interessant både som journalist å få dekka ordføraren sitt besøk i Ukraina, men også det å få sjå korleis folk faktisk har det der nede, korleis dei opplever krigen og kva hjelpesendingane frå Kvinnherad faktisk betyr for dei, seier den erfarne journalisten.

– Samtidig blir det også spanande reint personleg. Eg må også legga til at me, heldigvis, ikkje skal oppleva krigen på nært hald. Området me skal til er langt frå fronten, men me veit at dei har måtta gå i sikkerheit i bomberom også der. Dei kjenner heilt sikkert utryggheita på kroppen etter to år med krig, fortset han.

Takksam

Planen er å ta seg frå Norge til Danmark, før turen radig går vidare nedover Europa gjennom både Tyskland, Polen og Slovakia. Endestoppet blir like over grensa frå Slovakia i Ushgorod-området heilt vest i Ukraina.

– Ordføraren og Tormod skal køyra lastebilen oppatt, medan me andre skal ta fly frå Krakow, forklarer Nygård.

Nygård fortel også at han kjenner seg takksam for at dette let seg gjera og at han får vera med å bidra.

– Det kjennest godt å få bidra på ein aldri så liten måte. Det er dette me kan bidra med i denne omgangen, og så satsar me på at me får laga ein del gode reportasjar om turen og tilhøva der nede, avsluttar han.