Hærverk på måseskremsle

For å hindra at måsen grisar til kunstgrasbanen, har Rosendal Turnlag investert i eit apparat som lagar varselskrik døgnet rundt. Det har tydelegvis nokon blitt lei av.

Kunstgrasbanen i Rosendal ligg heilt i sjøkanten, og er ein populær opphaldsstad for måsar og andre fuglar. Men kombinasjonen måsar og fotballspelarar er ikkje spesielt gunstig.

– Enkelte dagar er det fullt av måsar her, og då ser det ikkje ut. Fiskeslo og avføring, samt morellar seinare på sommaren, ligg over alt, i tillegg til massevis av fjør. Er det i tillegg sol og varmt, så ligg skiten og gjærar, og då er det nesten ikkje forsvarleg å sleppa folk utpå her, fortel Arvid Nes, ungdomsleiar i fotballgruppa.

For nokre år sidan vart det difor sett opp eit apparat som etterliknar måsen sitt skrik for å varsla fare. Lyden har blitt sendt ut kvar halvtime døgeret gjennom, og har ført til at fuglane i alle fall for ei kort stund har landa andre stader.

– Fyrst og fremst er det i juni og juli vi har brukt dette apparatet. Det er ikkje for å plaga folk, men vi må gjera dette dei 1-2 månadane i året når måsen ligg på reir, opplyser Nes.

 

Heile sulamitten

Tidlegare har ein også prøvd å leggja ut gummiormar, men det gjekk berre nokre dagar før måsen gjennomskoda bløffen.

At det er ein relativt skingrande lyd som anlegget lagar, er ikkje til å koma frå. Arvid Nes forstår at folk i nærområdet ikkje let seg begeistra, men har ikkje motteke nokre klager. Natt til fredag, mest truleg, var det nokon som protesterte på sin eigen måte.

– Hadde vedkomande berre opna døra til skapet og teke ut kontakten, så hadde det for så vidt gått greitt. Men i staden har ein slite ut leidningane, røska ned og kasta heile sulamitten. Vi har ikkje funne utstyret igjen, og må såleis kjøpa nytt, sukkar Nes.

 

Tidsinnstillar

– Ein kan ikkje ta seg til rette på denne måten. Eg vonar at den eller dei som har gjort dette er så ærlege at dei står fram, oppmodar Arvid Nes, som tykkjer det er forferdeleg irriterande at eit friviljug lag må bruka oppsparte midlar på å vøla etter hærverk. I dette tilfellet er det snakk om utgifter på vel 6.000 kroner.

Han understrekar at turnlaget absolutt er opne for dialog med folk som eventuelt er plaga av lydane, og er sikker på at det er mogleg å finna løysingar som alle kan leva med. Uansett har laget planar om å kjøpa inn ein tidsinnstillar, slik at det kan bli stille frå til dømes 23 om kvelden til 5 om morgonen.

– Vi kan ikkje la måsen gå fritt her, då er det mogleg at vi heller må stenga banen, avsluttar Arvid Nes.