Hage i bratt terreng

Trass bratt terreng og vanskelege dyrketilhøve, har Knut Hansen i Skeishagen på kreativt vis etablert ein hage som blømer heile sommaren.

I samarbeid med Kvinnherad Hagelag arrangerer Grenda no Kvinnheradmeisterskapen i hage. Mange gode forslag er kome inn, og i dag presenterer vi den andre kandidaten. Men hugs, det er framleis råd å melda på deg sjølv eller nokon andre du meiner fortener det.

 

– For at ikkje molda skulle siga nedover bakken var det nødvendig å byggja etappevise bed i rismarkstil, seier Hansen.

I det du rundar hushjørna øvst i Skeishagen i Rosendal, er det første som møter deg ei bratt betongtrapp omfamna av etappevise blomsterbed ned mot betongplattingen og utsiktsområdet. Her har Knut Hansen planta ulike typar blomar, berre med eit føremål – at det skal bløma heile sommaren.

– Eg er ikkje så oppteken av kva blomane heiter så lenge dei blømer og luktar godt. For meg handlar det vel så mykje om at det ser fint ut og at eg har noko å putla på med, seier han. Og det er det tydeleg at han har hatt.

 

Frå Blådalen

Vidare nedover i hagen møter vi epletre, amerikansk blåbærbusk og fleire blømande vekstar av ulik sort.

– Igjen, eg er ikkje heilt sikker på kva dei forskjellege heiter. Eg plukkar med meg litt når eg er ute på tur. Ser eg noko eg synest er fint ut, så plukkar eg det med meg og sår det i hagen. Blant anna denne her, den fann eg i Blådalen, og den lever fint no for andre året på rad, seier han.

Kantklippar

Med ulike kreative løysingar har Knut Hansen fått mest mogleg ut av å ha ein hage i motbakke. Med etappevise bed og kantklippar som reiskap, har han etablert ein hage som fungerer året rundt.

– Det er litt tungvint å klippa plenen, men det går med kantklippar. Men hagen er heile tida i forandring og eg finn alltid ny inspirasjon til hageidear. Målet er sjølvsagt å ha så mykje spreidd rundt at eg ikkje treng å dra fram kantklipparen, men det er eit stykke fram dit enno, seier han.