Han blir Brann sin Fantasy-ekspert
Gjennom heile 2019-sesongen skal Terje Bru Markhus dela sine ekspert-tips for Eliteserien Fantasy med Brann-supporterane.
Det skriv SK Brann på sine nettsider.
Artikkelen held fram under annonsen.
Som Grenda har skrive om tidlegare, vart Terje Bru Markhus landets neste beste i 2018-utgåva av Eliteserien Fantasy. Med det vart han også den Brann-supporteren som gjorde det best i det virtuelle manager-spelet.
Eit resultat som fekk Sportsklubben Brann til å tenka på kjøpmannen frå Valen då dei bestemte seg for at dei sjølv skulle satsa på Fantasy denne sesongen. No vert han raudtrøyene sin Fantasy-ekspert og skal gjennom sesongen publisera sine tips på Brann.no.
– I fjor gjekk det veldig bra med ein 2. plass totalt. No håper eg å kunna bidra med gode tips til Brann-supporterane, seier han til Brann.no.
Ynskjer å bidra
Men korleis vert ein god i Fantasy?
– Ein må vera interessert og sjølvsagt sjå mykje fotball. Så må ein følgja godt med i dei kanalane der det finst aktuell informasjon, for eksempel på Twitter, seier Terje til nettsida.
Ein viktig del av Terje sine tips blir å plukka ut dei Brann-spelarane ein bør ha med seg på laget sitt.
Artikkelen held fram under annonsen.
– Det blir veldig kjekt, og eg håper eg kan bidra på ein god måte, seier Terje til Brann.no.
Terje sine fyrst tips vil bli servert på Brann.no litt før seriestart 30. mars.