Har du Kvinnherads finaste hage?

Har du ein hage du er stolt av, eller kanskje du har funne fram til ei kreativ løysing for å få mest mogleg ut av den grasflekken som følgde med huset?

Kanskje du har eit utruleg flott epletre som gir verdas beste eple, eller har du ein hage som slettes ikkje er noko fin, men som gjer nytten for deg? Ta eit bilete av han og forfatt ein liten tekst som fortel om det du har gjort, og send det inn til oss.

I samarbeid med Kvinnherad Hagelag arrangerer vi i Grenda Kvinnheradmeisterskap i hage. Vi er ute etter det mangfaldet av hagar som finst i kommunen vår. Anten det er ein ferdig opparbeidd hage med andedammar og frukttrer, eller ein liten koseleg hage i utvikling.

 

– Alle kan delta

Vi vil ut og besøkja nokon av dei beste bidraga og laga ein reportasje frå besøket. I tillegg vil ein jury frå hagelaget plukka ut ein vinnar som stikk av med eit gåvekort på Felleskjøpet Kvinnherad til ein verdi av 5.000 kroner.

– Hagen treng ikkje vera så steril og stor for at ein skal koma med bidrag. Ein hage kan vera så mykje. Eg synest ikkje folk skal vera redde for å visa fram hagen sin. Det kan vera ein fjellhage, ein naturhage, ein krukkehage eller noko anna. Det er så utruleg stort spenn, og alt har sin sjarm. Vi er interessert i alt, om det er ein ferdig opparbeidd hage, ein hage i utvikling eller nokon som har løyst noko på ein kreativ måte, seier Inger Sofie Sæbøe frå Kvinnherad Hagelag.

Konkurransen vil rulla å gå utover sommaren, men startar allereie i dag. Så har du eit bidrag er det berre å senda det inn til post@grenda.no eller i skjemaet under, så kjem vi kanskje på hagebesøk før du veit ordet av det.

 

[gravityform id="9" title="true" description="true"]