Har du sett hubro?

Statsforvaltaren ynskjer tips frå folk som har sett eller høyrt hubro i Vestland. Arten er diverre sterkt truga, og betre kunnskap er viktig for ta vare på fuglen.

Han er mest nattaktiv, og sjølv erfarne biologar ser sjeldan hubro.

«Best sjanse til å oppleva hubroen har du no i februar og mars. Då syng hubroen normalt like etter solnedgang og soloppgang. Det gjer den både for å markere territoriet og som ein del av parbindinga mellom makane», skriv Statsforvaltaren.

Kraftliner, arealinngrep og forstyrringar på reirplassen er dei viktigaste årsakene til at hubroen er lista som sterkt truga i Norge.

«Å finna ut kor hubroen held til er derfor avgjerande for å ta vare på hubroen i framtida. Betre kunnskapsgrunnlag kan òg gje meir føreseieleg arealforvalting i nærområda, ettersom ein då allereie kjenner betre til kor den har tilhald», står det på Statsforvaltaren i Vestland si heimeside.

På landsbasis er hubrobestanden estimert til drygt 1.000 hekkande par. I Vestland vurderer ein bestanden til å vera 70-100 hekkande par, og med eit tyngdepunkt i søndre delar av fylket. Hubroungane er svært sårbare for forstyrringar. Det er derfor viktig å ikkje oppsøka hekkeplassar til hubro i perioden februar-august.