Har fått millionstøtte til forsking

Forskar Miriam Hartveit ved Valen sjukehus har saman med to forskarar på Haukeland universitetssjukehus fått heile 12 millionar kroner i støtte frå Norsk Forskningsråd.

Saman med professorane Eirik Søfteland og Stig Hartug på Haukeland universitetssjukehus, skal Hartveit forska nærmare på temaet «Effektiv implementering av pasientsikkerheitstiltak». Her skal dei blant anna studera nærmare kva som kjenneteiknar prosessen og institusjonar si implementering av pasienttryggleikspakkar. Basert på funna skal forskartrioen utvikla og testa metodar for å auka helsetenesta si evne til å ta i bruk ny kunnskap. Målet er at pasientar skal få oppdatert og sikker behandling og ivaretaking, skriv Helse Fonna i ei pressemelding.

 

Breitt samarbeid

Støtta på 12 millionar kroner er ei av dei største enkelttildelingane Helse Fonna nokosinne har fått frå Forskningsrådet.

– Vi skal blant anna studera implementering av tiltakspakkar for rett bruk av antibiotika, og korleis pasientar med forverring i tilstand blir tekne vare på. Dette er tiltakspakkar vi skal bruka både i primær- og spesialisthelsetenesta, seier Miriam Hartveit i pressemeldinga.

Forskaren på Valen sjukehus legg ikkje skjul på at ho er glad for tildelinga, og ho framhevar eit breitt regionalt samarbeid i prosjektet.

 

Stolte og glade

Det er mange forskingsmiljø involvert, men samarbeidet med FOUSAM og Brukarpanelet for forsking i Helse Fonna blir særleg trekt fram.

Avdelingsleiar for forsking og innovasjon i Helse Fonna, Anne Lise Kvalevaag, er både stolt og glad for støtta.

– Tildelinga er ei stadfesting på eit høgt fagleg nivå i helsetenesteforsking. Miriam Hartveit, som deltek i prosjektet for Helse Fonna, har forska innan dette feltet i ei årrekkje, og er no ein del av eit særs anerkjent nasjonalt og internasjonalt forskingsmiljø. Vi er stolte og glade over vår deltaking i dette prosjektet, seier Kvalevaag i pressemeldinga.