Har funne E. coli i vassverket – har sendt ut kokevarsel
Omlag 7.000 personar er råka.
Torsdag føremiddag har Kvinnehad kommune sendt ut kokevarsel for alle kommunale vassabonnentar i Husnes vassverk sitt forsyningsområde.
Oppmodinga er at vatnet bør fosskokast i eitt minutt.
Årsaka skal ifølgje meldinga vera at det er funnen bakteriar i vassprøvane.
Einingsleiar for vatn og avløp, Egil Eide, fortel til Grenda at det er gjort funn av e.coli-bakterie på sjølve vassverket.
E. coli er ei fellesnemning for bakteriar som finst naturleg i tjukktarmen hos alle menneske og varmblodige dyr. Ifølgje Helse Norge er E. coli-tarminfeksjon i dei fleste tilfelle ufarleg, men ein sjeldan gong kan infeksjonen gje alvorleg sjukdom.
– Vi tok prøvar ute på nett i går, som var heilt fine. Funnet av E. coli er gjort på vassverket.
Husnes vassverk forsyner kommunale vassabonnentar på Valen, Husnes, Sunde og Halsnøy, som omfattar kring 7.000 personar.
Eide legg til at dei no er i gang med å ta nye prøvar, men at det tar eitt døgn før desse er analyserte.
– Så må vi ha to friske prøvar før vi kan ta vekk varselet igjen. I beste fall betyr det to dagar med kokevarsel, men vi må sjå kva dei nye prøvane viser, og ta det derifrå, sluttar han.
