Har målt nedbøren i 75 år

Harald Mehl har målt nedbøren på Mel sidan han var 15 år gamal. Onsdag kom representantar frå Meteorologisk Institutt for å gje han blomar og bok som takk for trufast teneste.

– Vi ville gje ei personleg takk til Harald, som har vore min favorittobservatør av vêret i Noreg. Han har vore ein ypparleg og nøyaktig observatør. Eg vart særleg imponert då han som 85-åring lærte seg å senda inn daglege tal på sms. Harald sa at viss alle andre klarar det, må han òg klara det, fortel Ted Torfors ved Meteorologisk Institutt.

– Det er det same skrytet, veit du. Eg trur ikkje du skal ta det så veldig bokstaveleg, det der, men det er jo godt at dei læt vel, humrar Harald.

– Det har no vore eit arbeid, og, å måla nedbøren kvar morgon?

– Det er nettopp det, ein kan ikkje reisa lenge i frå det. Ei stund hjelpte søster mi meg, og naboen Jan Eik har vore ein god hjelpar, seier Harald som ikkje vil ha for mykje skryt for den vesle plikta han har hatt kvar morgon i 75 år.

– Har du vore spesielt interessert i vêret?

– Ikkje så fælt. Men det er mykje det folk snakkar om. I alle fall før. Eg gjekk no heime og var nett konfirmert, så då høvde det, seier Harald.

 

Store skilnader

Han fortel at det er stor skilnad på nedbøren i dei ulike sonene i Hordaland. Det gjer det vanskeleg å melda vêret her.

– Difor er det viktig med tettast mogleg stasjonar, seier Harald Mehl.

For å visa kor ulik nedbøren kan vera i Hordaland, syner Harald fram eit brev datert 17.juni 1930, sendt til gartnaren på Baroniet Valdemar Andersen frå Vêrvarslinga på Vestlandet. Andersen målte nedbøren fram til Harald overtok i 1940.

– Distrikta vest for Folgefonna har meir regn enn Hordaland for øvrig. Næraste nedbørsstasjon til Rosendal, i Indre Matre, har over 2600 mm i årleg nedbør, medan Bergen ikkje har meir enn 1800. Den ytste øygarden har knapt 1000. Det er derfor sannsynleg at Rosendal har meir samanhengande regn enn resten av Hordaland. Melder vi opphald i Hordaland, reknar vi med at dei kjente regnhòla ved Folgefonna også skal ha opphald, kan ein lesa i brevet.

 

Hyllest

Harald har arkivert nedbørsrekordane frå dei 75 åra han har vore i vêrmeldinga si teneste. Det våtaste året var 1967, då det regna heile 2589 millimeter. Den våtaste månaden var oktober 1983, og det våtaste døgeret 15.desember 1936. Det tørraste året var 1941.

– Eg hugsar den tørraste månaden. I april 1974 målte eg berre 0,1 mm nedbør. Når eg måler er det slik at sjølv om eg ikkje trur det har regna ei natt, så skal eg ut og tøma den kaffikanna kvar morgon, for sikkerheitsskuld, seier den trufaste vêrmålaren.

Om vinteren måler Harald snømengd. Då må han ta inn snøen, setja ut ein annan behaldar i mellomtida, og smelta innhaldet i den første før han kan lesa av millimetrane. Neste år feirar vêrmeldinga i Noreg 150 år. Då kjem det ut ei bok som skal vera ein hyllest til observatørane. Harald har blitt intervjua i samband med bokprosjektet.

– Observatørane er framleis svært viktige. Vi har 300 observatørar som måler nedbøren kvar morgon. Dette er viktig materiale reint klimatologisk, og gjev eit godt bilete av nedbøren i landet. Målingane blir brukt for å verifisera vêrvarslinga vi gjer. Harald Mehl har vore veldig pliktoppfyllande, og det er viktig å ha stasjonar som har stått på same staden under same forholda i så mange år, seier Ted Torfors.

Frå oktober er det naboen til Harald, Jan Eik, som overtek nedbørsmålinga.