Har starta innsamlingsaksjon for å gje Renate ei minnerik gravferd

Ein nær ven av sonen til Renate Strand Normann har starta ein innsamlingsaksjon for å gje Renate ei fin og minnerik gravferd.

Torsdag kveld vart Renate Strand Normann funnen død på Varaldsøy etter ei tragisk hending. Igjen etterlet ho seg ein son på 22 år.

Erlend Fredheim er nær ven av sonen, og gjer no sitt for å støtta han i ei svært vanskeleg tid. Med samtykke frå dei pårørande har Erlend starta ein innsamlingsaksjon på Spleis.no.

– I ei tung tid med komande rettssaker, avhøyr og sjukemeldingar er det vanskeleg for ein 22-åring å kunna gje ei så fin og minneverdig gravferd som han ynskjer. Ei gravferd kostar mykje pengar, og vi håpar at vi gjennom denne spleisen kan hjelpa til så godt som mogleg, seier Erlend.

Godt formål

Måndag føremiddag hadde dei fått inn 29.500 kroner på Spleisen.

– Alle donasjonar vert teken i mot med stor takk og vil koma godt til nytte, står det å lesa inne på Spleis-sida.

Eit eventuelt overskot frå spleisen vil bli donert til eit godt formål.

– I samråd med familien så har vi funne ei god, lokal sak som vi ynskjer å støtta. Eventuelle overskot frå denne spleisen vil bli donert til rus- og psykiske helsetenester i Kvinnherad kommune, seier Erlend.