Heiderspris til Sveinung Sandvik

Sveinung Sandvik er tildelt AqKva-prisen for 2018. Den får han for sitt langvarige og breie engasjement i oppdrettsnæring.

– Eg er utruleg stolt og rørt over å ha fått denne prisen, ein vert aldri for gamal til å verta sett pris på, seier 64-åringen til Kyst.no.

 

Langvarig engasjement 

AqKva-prisen er ei utmerking som kvart år går til ein aktør i havbruksnæringa som gjennom sin innsats eller langvarig engasjement har teke næringa eit steg framover og vore eit eksempel til etterfølging. Og på den måten gjort seg fortent til ein hyllest frå heile havbruksnæringa. Ein pris Sandvik vart overraska over å få.

– Etter vel 40 år i havbruksnæringa så har eg jo lurt på om eg kanskje bør gje meg å la nye krefter sleppa meir til. Det er jo sunt med utskiftingar i posisjonane, men samstundes er det jo kjekt at folk set pris på at eg har heldt på så lenge, seier han vidare til Kyst.no.

 

– Eit ja-menneske

I grunngjevinga skriv juryen at Sveinung Sandvik fyller kravet fullt ut både når det kjem til langvarig engasjement og god innsats.

– Denne gongen er det ein veteran i bransjen som er utvalt. Prisvinnaren har vore ein svært aktiv og synleg aktør og bidragsytar i havbruksnæringa heilt sidan han saman med naboar starta opp ei bedrift i bransjen på midten av 80-talet. Denne bedrifta har utvikla seg og lev godt den dag i dag. No som ein del av eit større fellesskap, skriv juryen.

Vidare skriv juryen at Sandvik er ein kunnskapsrik og ekstremt samfunnsorientert. At han har stor arbeidskapasitet, at han verkeleg brenn for havbruksbransjen og ser viktigheita av å vera til stades der saker vert diskutert.

– Prisvinnaren er eit ja-menneske som tek på seg oppgåver langt utover det som han må. Ofte legg han ut ein redningsplanke når ingen andre vil ta på seg ei oppgåve, står det å lesa i grunngjevinga til juryen.