Heidra dei som ofra seg

Eit titals personar møtte opp for å ta del i markeringa av Frigjeringsdagen og Veterandagen ved minnesteinen over dei falne under andre verdskrig ved Husnes kyrkje søndag.

Totalt 11.893 nordmenn mista livet under andre verdskrig. 15 av dei har fått namnet sitt hogd i stein i minnesmerket ved Husnes kyrkje. Søndag vart dei minna med kransenedlegging, dikt og song.

Seremonien opna med at kultursjef Kristian Bringedal gratulerte dei frammøtte med dagen før han framførte «No livnar det i lundar». Etterpå gav Geir Dolonen-Marthinussen frå «Leave no man behind» og Norges veteranforbund for internasjonale operasjoner sin minnetale. Der han la vekt på at dette er ein dag for alle pårørande, og for å heidra alle som falt under andre verdskrig.

Etter det las Kristian Bringedal opp namna til dei 15 personane på minnesmerket og deira historie under krigen. Den verdige markeringa vart avslutta med eit dikt frå Wilhelm Bjelland og to vers frå nasjonalsongen før alle vart inviterte til veteransamling på Peppes.