Heidra for sin livreddande innsats

Endre Teigen vart onsdag kveld heidra av Ordførar Peder Sjo Slettebø og brannsjef Atle Josdal for sin innsats i samband med badeulukka i Opsangervatnet førre laurdag.

Endre, som er tilsett som brannmann ved hovudbrannstasjonen på Husnes, var laurdag 2. juni nede ved Teigen-sida av Opsangervatnet og bada med familien då han høyrte rop om hjelp vel 700 meter unna. Han reagert raskt, henta kajakken sin og padla det han makta ut mot ungdommane.

Framme ved ulukkesstaden fekk Endre 17-åringen opp på land og gjennomførte hjarte- og lungeredning i tida fram til naudetatane kom til staden.

– Du har vore med å redda eit ungt liv, og vi er veldige stolte og djupt takksame for den innsatsen du har gjort. Det finst ikkje måtar å få takka deg nok på, sa Peder Sjo Slettebø.

Han overrekte ein rosebukket og eit kort frå Kvinnherad kommune før brannsjef Atle Josdal fekk ordet.

– Den raske reaksjonen og innsatsen din har utan tvil vore med på å redda livet til denne unge guten. Som brannsjef er eg mektig stolt av å ha brannmenn som deg med på stasjonen. Du og dei andre brannkonstablane og utrykkingsleiarane gjer ein utruleg jobb for Kvinnherad kommune. Det gode samarbeidet mellom politi, helse og brannvesen bidreg til å trygga kommunen sine innbyggjarar, sa Josdal.