Helse Fonna bed publikum vurdera om besøk er nødvendig

Helse Fonna ynskjer at publikum vurderer om det er nødvendig å besøkja pasientar fram til 18. januar.

Med nødvendig besøk meiner Helse Fonna besøk til alvorleg og kritisk sjuke pasientar, pasientar i siste fase av livet, pasientar som er innlagt over tid, og der besøk er viktig for behandling eller livskvalitet, og besøk til barn og ungdom, står det å lesa i ei pressemelding.

– Statsminister Erna Solberg gjekk søndag ut og bad nordmenn om å ikkje gå på besøk til kvarandre dei neste to vekene. Då er det naturleg at denne oppmodinga også gjeld besøk til sjukehusa, seier administrerande direktør Olav Klausen i Helse Fonna.

Klausen oppmodar pårørande og andre som ynskjer å koma på besøk på eit av Helse Fonna sine fire sjukehus om å utsetja det til etter 18. januar, om ikkje besøket er nødvendig.

– Drifta på sjukehusa våre går som normalt, og vår viktigaste oppgåve er å ta oss av pasientane. Difor håpar vi at folk tek oppmodinga frå statsministeren på alvor, nettopp for at vi skal kunna halda oppe normal drift framover, seier Klausen i pressemeldinga.