Helse fonna reduserer planlagt aktivitet

Helse Fonna reduserer aktiviteten og førebur seg på fleire koronapasientar neste veke.

Fredag morgon var det åtte pasientar innlagt med covid-19 på Haugesund sjukehus. Ein av desse får intensivbehandling. Og i løpet av morgontimane fredag vart det også lagt inn ein koronapasient på Stord sjukehus, det er den første på fleire veker.

– Det er gledeleg oppi dette er at det sidan i går er to pasientar som ikkje lenger treng intensivbehandling. Blant anna er pasienten under 18 år no formelt utskriven frå intensivavdelinga. Det er eg svært glad for, seier administrerande direktør Olav Klausen i Helse Fonna i ei pressemelding.

 

Naudsynt å redusera

Frå neste veke blir mykje av planlagt aktivitet i Helse Fonna redusert, slik at føretaket er i stand til å ivareta kritiske funksjonar, og ta i mot fleire pasientar med covid-19.

– Vi er inne i ein fase der det er naudsynt å redusera aktiviteten. Det meste av planlagt kirurgi ved alle tre sjukehusa i føretaket blir utsett, men mellom anna pasientar med mistanke om kreft og barn under 18 år blir skjerma. Eg er lei meg for at vi må redusera tilbodet til pasientane våre, men vi må no førebu oss på å ta i mot mange fleire pasientar med covid-19 både på vanlege sengepostar og på intensivavdelingane, seier Klausen.

Også poliklinisk aktivitet vert redusert i varierande grad rundt om på avdelingane. Her vil Helse Fonna ta kontakt med dei pasientane som vert råka.

– Reduksjon i planlagt aktivitet vil halda fram til over påske. Det vil seia til og med 5. april. Det vert i tillegg gjort fleire grep dersom det kjem fleire koronapasientar komande veke, skriv Helse Fonna.