Her er dei 16 kandidatane i utslagsrunden - siste frist er onsdag kl 09.00!
I år vert det fyrst utslagsrunde i kåringa av «Årets namn i Kvinnherad». Du har 16 namn å velja blant, og dei tre med flest røyster går vidare til den store finalen.
No er det opp til folk der ute til å senda tre vidare til finalen. Røystinga kan mellom anna skje via skjemaet under. Men NB! Feltet med namnet til den som røystar må fyllast ut. Røystesetlar som manglar skikkeleg namn, vil ikkje bli godteke. Dette er for at Grenda skal kunne sjekka at folk ikkje har røysta fleire gonger, for hugs at du berre kan røysta éin gong.
Vi oppmodar som alltid om at ein røystar på den kandidaten ein tykkjer fortener heideren mest, uavhengig av geografi, kjennskap og andre moment.
Artikkelen held fram under annonsen.
Det kom inn uvanleg mange forslag på kandidatar i år, noko som er svært kjekt. Vi har trekt ut Sigmund Nordfonn på Sunde som vinnaren av tre Flaxlodd.
Fristen for å røysta i utslagsrunden er allereie onsdag 13. desember klokka 09.00.
Dei tre finalekandidatane vert presenterte torsdag 14. desember.
Kandidatane
Her er litt informasjon om kandidatane (i alfabetisk rekkefølge):
1. Tina Abdulla: Handballspelaren frå Husnes har både spelt i Champions League og vore på samling med landslaget. Til dagleg spelar ho for Storhamar.
2. Trude Beckholdt (Brøddamo): «Utan hennar innsats er det mange i Kvinnherad som måtte gå svoltne til sengs», skriv ein forslagsstillar. Ein annan legg til: «Ho står verkeleg på for alle som treng det. Ho er sjeldan sort».
3. Daidalos Dahle: Ikkje berre er han tilsett som dagleg leiar for Kvinnherad Arena, som opna i april. Han er òg bookingsjef for Festidalen som opplevde eit rekordår.
4. Johannes G. Eide: «Han er ein framifrå kandidat. Eide er samfunnsengasjert, og har dei seinare åra lagt ned ein formidabel ueigennyttig innsats, tid og ressursar for å få Halsnøy historiske senter opp å stå», skriv forslagsstillaren.
Artikkelen held fram under annonsen.
5. Lars Kristian Ekeland: Volleyballspelaren frå Hatlestrand imponerte med NM-gull og vart kåra til banens beste i finalen. Seinare teikna han proffkontrakt i Tyskland.
6. Ragnhild Femsteinevik: Skiskyttaren konkurrerer i ein idrett som er stor over heile Europa. Likevel hevdar ho seg heilt i verdstoppen, og fekk også gå fleire renn under årets VM.
7. Halsnøy J17-fotball: Jentene imponerte kolossalt i Norway Cup, der dei kom heilt til semifinalen i A-sluttspelet. Saman med trenar Christine Solheim Fjelland kunne dei også feira sigeren i 1. divisjon i seriespelet.
8. Tormod Myklebust: Uskedelingen har halde fram sitt mangeårige engasjement for å hjelpa fattige og krigsråka i Ukraina. Han samlar inn både klede, leiker og takpapp. Han var nominert også i fjor, og vart då nummer to.
9. Astri Måkestad: «Ho har fått etablert lokallag for kreftråka og pårørande, arrangert temakafear for denne gruppa, arrangert Rosa sløyfe-marsj, og ikkje minst vore pådrivar for 100% stilling for kreftkoordinatoren», vert det opplyst i forslaget.
10. Kim Røssland: Trenar for dei lokale stortalenta i volleyball, men ikkje minst dagleg leiar for Herde kompositt som har kome seg gjennom tøffe tider, og no er i full gang med egg nummer 2.
11. Salmon Eye ved Sebastian Lamberg Torjusen, Sondre Eide og Anika Madsen: «Eg blir ikkje overraska om det blir ein stjernemerka etestad. Dette gjev store ringverknader i lokalsamfunnet vårt», heiter det om staden som har fått internasjonal omtale og heider.
12. Øystein Skaala: Utan han hadde det ikkje vore noko steinpark eller dinosaurhus. Stadig set han i gang med nye prosjekt og arrangement, og i sommar var det premiere på filmen «Slik tok menneska over Jorda».
Artikkelen held fram under annonsen.
13. Kjell Magne Stråbø: «Han må vera på lista. Han jobbar utrøytteleg for Sunde kyst- og litteratursenter», står det om karen som kan gle seg over at Bergslagen no er teke i bruk.
14. Jørn Øyrehagen Sunde: Professoren frå Uskedalen har verkeleg vore i vinden i det siste. Overstrøymande bokomtale i BT, internasjonal pris i Belgia, eigen podkast og julekalender på nettsida til Nasjonalbiblioteket.
15. Arne Torget: «Ein utmerka ambassadør for Kvinnherad», heiter det om mannen som er aktuell med boka «Pus», og som nett var gjest i Eides språksjov.
16. Lars Wang: «Ungane ynskjer å nominera Kvinnherads beste bussjåfør. Alltid like blid, imøtekomande og hyggeleg», stod det i forslagsbrevet. Han er også engasjert i veteranbusslaget.