Her er dei tre finalistane

Utslagsrunden i Årets namn-kåringa er unnagjort. Veldig mange røyster vart levert, enten via røysteskjemaet på Grenda si nettside, på e-post, på telefon, i brev eller ved frammøte i bladstova. Ekstra kjekt i år var det at også dei som hamna nedst på lista fekk godt med stemmer.

I teten var det særdeles tett kamp om å koma blant dei tre som går vidare til finalen. No sit vi igjen med tre svært verdige moglege vinnarar. I tilfeldig rekkefølgje (via random generator) er det Synneva Seim, Kjersti Hjelmeland og Kristine Frøystein Reime.

Dei som kom nærast (også i tilfeldig rekkefølgje) var Astri Skaaluren Måkestad/Bente Haugen, Ragnhild Femsteinevik og Anders Kjærevik.

Synneva Seim:

Ho er leiar for både Seimsfoss grendalag og Kvinnherad skyttarlag, og syslar med alt frå 17. maifeiring og jonsok til familiedagar ved Kvedno. Men ikkje minst bidreg ho til at rundt 50-60 personar kjem seg på styrke- trening to gonger i veka. «Dette gjer ho utan betaling på dugnad for fellesskapet. I tillegg lagar ho til Ungdomsklubb i Grendahuset éin gong i månaden», står det i eine forslaget om å nominera ho.

Kjersti Hjelmeland:

Det kan verka som at Kjersti Hjelmeland frå Omvikdalen har ei klokke som viser meir enn 24 timar. Ho er i alle fall engasjert i mykje, og har i 2025 mellom anna arrangert open gard og stilt med hest på cowboyfestane til «Med hjarte for alle i Kvinnherad». I sommar rykte ho opp frå vervet som nestleiar i Vestland bondelag til styret i Norges bondelag.

Kristine Frøystein Reime:

Ho har opna garden sin for store og små, både ved å arrangera open dag og ved å bli ein Inn på tunet-gard. Gjennom prosjektet har ho bidrege til at folk med ulike utfordringar mellom anna har fått lov til å kjenna på meistring, fått auka sjølvkjensle samt fått ei tilhøyrsle. Ho er også leiar av Søre Kvinnherad Skogeigarlag, og har organisert treplanting som ei alternativ dugnadsform for ei rekke lag.

Som alltid oppmodar vi folk om røysta på den kandidaten dei meiner fortener heideren mest, uavhengig av geografi, kjennskap eller andre tilhøve. Og til dykk som stemmer på nett: Hugs å skriva BÅDE fornamnet og etternamnet ditt, elles vert stemma forkasta! Årsaka til denne regelen er at avisa må ha høve til å kontrollera at alle røystene er ekte og at ingen har stemt fleire gonger, i tilfelle det skulle verta jamt.