Herads- eller kommunestyret

Rådmann Odd Ivar Øvregård er vane med å seia herad i staden for kommune. Han slit med å skifta, noko som tydeleg kom fram i herads… – unnskyld, kommunestyremøtet på torsdag.

– Eg håpar de tilgir meg at eg seier heradsstyret, innleia rådmannen då han skulle gå gjennom planen for ny organisering av kommunen.

– Eg prøver å skifta, men det er ikkje lett for ein sambygding av Ivar Aasen, og som i tillegg har ein son som har vore leiar i Noregs Mållag, utdjupa han.

– Det spørst om vi ikkje skal skifta til heradsstyret, trøysta Gunnar Våge (Sp).

Øvregård får nok tilgjeving for å seia herad. Men at han éin gong sa Osterøy, hans førre rådmannsjobb, i staden for Kvinnherad er gjerne verre.

– Viss du betalar ein hundrings for kvar gong du seier Osterøy, så tenkjer eg du fort legg det av deg, føreslo Gaute Lund (Raudt).

– Kanskje eg heller skal betala hundre kroner kvar gong eg seier Kvinnherad, det vert meir effektivt, humra Øvregård til svar.