Høge brøytekantar i fjellet

Med tanke på at mai syng på siste verset, er det særdeles mykje snø igjen i fjellheimen i Kvinnherad.

Etter å ha høyrt rykte om svært høge brøytekantar i Blådalen, tok Grenda turen innover søndag ettermiddag for å ta fenomenet nærare i augesyn. Fram til Grønlio var det lite spennande å melda. Både vegen og området rundt var fullstendig snøfritt. Fyrst ved Storbjørnsli vart fjellsidene heilt kvite, og ved Brandvikvatnet, 514 meter over havet, dukka dei fyrste, beskjedne brøytekantane opp.

Frå Blådalsvatnet, i om lag 700 meters høgde, og vidare innover var situasjonen heilt annleis. Her var det brøytekantar som raga dobbelt så høgt som bilen, og vel så det, på det verste. Sjølv om køyretilhøva var uproblematiske, var det likevel naudsynt å halda eit auga med omgjevnadane. Snøen byrja å bli ròten, og einskilde stader truga nokre flak med å detta ned å vegen.

 

Sperra vegen

Ved utløpet av den inste tunnelen, var det slutt på ferda. Der låg det nokre steinar midt i vegbana, og like innanfor hadde snøen rast ned og hindra vidare avansement. Dermed var det ikkje mogleg å koma heilt inn til kraftstasjonen Blåfalli IV og opp til Møsevatnet denne dagen.

Sjølv om det er interessant med slike oppdagingsturar, må alle skodelystne vera obs på at brøytekantane kan rasa ned utan varsel, og såleis gjera returen vanskeleg. I verste fall kan ein òg få ei ladning oppå bilen.