Hydro Husnes gav 100.000 kroner

Onsdag morgon overrekte Hydro Husnes-direktør Johan Berg ein sjekk på 100.000 kroner til aksjonskomiteen i Kvinnherad.

– Det gjer vi for at Hydro er ei kunnskapsbedrift, og vi ynskje å bidra til at barn i vanskelege situasjonar også skal få moglegheit til utdanning. I tillegg oppmodar vi våre tilsette og kvinnheringar elles til å bli med og bidra på søndag, sa Johan Berg då han overrekte sjekken til aksjonskomiteen onsdag føremiddag.

Ein sum som bidreg til at aksjonen i Kvinnherad får ein strålande start.

– Å begynna med 100.000 kroner er utruleg kjekt. Og dette er ikkje fyrste gong Hydro bidreg, vi har fått av dei fleire gongar før. Og vi er alltid veldig glade når telefonen frå Sveinung Grønstøl kjem på denne tida av året, smiler Veronica T. Thorsen.

 

Ringerunde

Aksjonskomiteen håpar at Hydro si givarglede skal inspirera andre bedrifter i Kvinnherad til å bli med på dugnaden. Noko dei får ein sjanse til når representantar frå alle Sunnhordlandskommunane torsdag samlar seg på Stord for ein ringedugnad rundt om til bedriftene i regionen.

– Vi er veldig glade for at Hydro bidreg så mykje som dei gjere. Og vi håper andre bedrifter vil bidra under ringerunden torsdag, seier ordførar Peder Sjo Slettebø.

 

Sunde og Løfallstrand

Aksjonskomiteen har fått inn vel 150 bøsseberarar til søndagens store dugnad, men er framleis i vande for nokon. Så om du har ledig tid og vil bidra, er det berre til å ta kontakt med Kvinnherad Frivilligsentral.

– Ja, vi manglar nokon bøsseberarar på Sunde og på Løfallstrand. Så her er det berre å melda seg, oppmodar Veronica T. Thorsen.