– Hyttefolket slurvar med brannsikkerheita
Denne sommaren vil fleire hytteeigarar bruka hytta si meir enn dei pleier om sommaren. Brannvesenet oppmodar difor alle til å sjekka at alt står bra til med brannsikkerheita.
– Vi har ikkje eksakte tal for hytter i vårt område, men vi veit frå andre stadar i landet at nær 40 prosent av alle hytter ikkje har fungerande røykvarslar. Det er også over 50 prosent som ikkje har sløkkjeutstyret i orden. Vi håpar at hyttefolket her i vårt område tar dette på alvor, og sørger for at det ikkje er slik her hos oss, seier varabrannsjef Øyvind Ousdal i Kvinnherad brann og redning i ei pressemelding.
Artikkelen held fram under annonsen.
Brannsikkerheit på hytta er tema i ein landsdekkande sommarkampanje i regi av Norsk brannvernforeining og Tryg Forsikring. Den nasjonale hyttekampanjen sitt viktigaste bodskap er at alle må sikra seg at dei har fungerande røykvarslar. I tillegg til det har brannvesenet laga til ei sjekkliste til alle hytteeigarane der ute.
– Det finst ei enkel sjekkliste for brannsikkerheit på hytta. Vi oppmodar alle å forhalda seg til den. Print den gjerne ut, og heng den opp på veggen, seier Ousdal.
Sjå sjekklista her:
1. Sjekk røykvarslarane kvar gong du kjem på hytta.
2. Ha alltid ekstra batteri i reserve.
3. Gå aldri frå levande lys.
4. Ikkje bruk peis/omn som tørkestativ.
Artikkelen held fram under annonsen.
5. Deponer og kast askeavfall på ein forsvarleg måte.
6. Ikkje gå frå hytta med elektriske apparat i bruk.
7. Vær ekstra varsame ved bruk av gass.
8. Sjekk utstyr og slangar jamleg.
9. Sørg for rikeleg tilgang til sløkkjeutstyr.
10. Bruk godkjente fagfolk til utbetringar som krev dette.