Ronny Teigen (t.v.) og Rune Petterson i Pit'n bros Racing Team skal i helga kappkøyra mot eit akrobatfly under Stord Airshow.

I dette beistet av ein bil skal Ronny kappkøyra mot eit fly

Ronny Teigen og hans Chevrolet Camaro har fått det ærefulle oppdraget med å opna årets flyshow på Stord.

Laurdag føremiddag set han seg nemleg inn i sin Camaro Z28R med ei noko uvanleg utfordring føre seg. For der Ronny og laget hans Pit’n bros Racing Team til vanleg konkurrerer mot andre firehjula doningar på bane, skal han no kappkøyra mot Håvard Dale og hans akrobatfly.

– Det vert tøft å prøva noko nytt, og så er det jo litt stas at vi får ta del i eit flyshow med ein bil, seier Ronny Teigen.

Men det er ikkje kva som helst bil det er snakk om. Det er bilen som Ronny har brukt tusenvis av timar på å byggja, ein bil som er unik i sin klasse, og som kan by på imponerande 1060 hestekrefter og ein toppfart på 320 kilometer i timen.

– Det er den raskaste som har vore på flystripa på Stord, seier Rune Petterson.

 

Artikkelen held fram under annonsen.

Akselerasjon

Då Ronny i fjor testa flystripa klarte han å dra bilen opp i 290 kilometer i timen etter å ha nådd turtalssperra. No er bilen gira om, noko som betyr at det er ein ny rekord i vente. Men om det er raskt nok til å slå eit fly, det står att å sjå.

– Vi skal køyra to etappar. Ein akselerasjonskonkurranse der vi kappast fram til midten av flystripa, vel 750 meter. Og ein andre etappe der vi køyrer til enden av flystripa for å snu og så køyra i mål ved midten igjen, seier han.

Særskild i etappe éin har han ein plan om å bita frå seg.

– Det er jo eit show, så det er jo mest for publikum dette her. Men samtidig seier ein jo aldri nei til ein siger, og bilen har bra akselerasjon, så kanskje vi kan klara noko på fyrste etappe, seier han før Rune skyt inn:

– Folk bør absolutt reisa over å få dette med seg. Ein får sjansen til å sjå noko ein sjeldan ser, det går så ekstremt fort, det bråkar skikkeleg og stinkar sprit, seier han.

Artikkelen held fram under annonsen.

 

Dårleg heimebrent

Det er ikkje vanleg bensin dette gliset går på, det er 98 prosent etanol.

– Det lukter dårleg heimebrent, så det vekkjer heilt klart nokre ungdomsminne, ler Rune.

Etter at Ronny har opna laurdagens flyshow på Stord, vert det også moglegheit til å få med seg fleire akrobatiske luftstunt utover ettermiddagen.