Ingen fleire positive testar blant dei tilsette

Så langt har ingen fleire medarbeidarar ved Stord sjukehus fått påvist covid-19.

Fredag kveld fekk ein tilsett ved Stord sjukehus påvist covid-19, og måndag morgon er 25 medarbeidarar og éin pasient i karantene.

Alle medarbeidarane som testa seg fredag kveld og laurdag har no fått svar, ingen av dei har fått påvist covid-19. Dei tre siste skal testa seg i løpet av måndagen i sine heimkommunar.

– Vi er sjølvsagt glade for at alle testane er negative, men dei skal framleis vera i karantene ut veka, difor har det vore ein kabal å få alle vaktene fylt opp. Men det har vore lagt ned ein kjempeinnsats i helga, og også utover i veka ser det ut til at vi skal klara å halda oppe bemanninga. Mange har stilt opp ekstra, noko eg er takksam for, seier klinikkdirektør Anne Beth Njærheim ved somatikk på Stord sjukehus i ei pressemelding.

Det betyr at drifta går tilnærma som normalt.

– Det er litt redusert aktivitet på poliklinikkane, og nokre kirurgiske inngrep er utsett, elles går alt som normalt, seier Njærheim.

Måndag morgon kom det også ei gladmelding frå Stord sjukehus, som har hatt mange pasientar med covid-19 dei siste vekene. Søndag vart den siste av desse utskriven, og måndag er det for første gong sidan 27. desember ingen innlagde koronapasientar på Stord sjukehus.

I Helse Fonna er det no éin pasient med covid-19 innlagd på Haugesund sjukehus.