Ingen fleire smitta etter koronatilfellet i Kvinnherad

Verken familie, vener eller klassekameratar har fått påvist koronaviruset etter smittetilfellet i Kvinnherad.

I førre veke vart det sjette tilfellet av koronaviruset stadfesta i Kvinnherad. Eit tilfelle som utløyste ei stor smittesporing, blant anna ved at Kvam vidaregåande bestemte seg for å stengja ned skulen.

I etterkant av det har 72 ungdomar i Kvam blitt testa for korona, samt nærkontakt her i Kvinnherad. Alle prøvane har kome tilbake negative.

– Det er null påviste tilfelle i Kvinnherad etter smittesporinga. Noko som sjølvsagt er bra, men òg litt rart. Men så er det slik at personar som har viruset, men som ikkje har symptom er mindre smittsame, seier Opland.

– Kan de utelukka at det er eit falskt prøvesvar?

– Det kan vi ikkje. Sjølv om det er veldig lite sannsynleg, så er det ein moglegheit for falskt prøvesvar, seier han.

Vedkomande som var smitta i Kvinnherad er no frisk og ute av karantene, melder Bergens Tidende.

Til same avis stadfestar ordførar Torgeir Næss i Kvam herad at ingen av dei 72 personane som vart testa for korona var smitta.