– Ingen grunn til å tru at vedkomande er smitta

Malmanger skule har sendt ut ein e-post til dei føresette om at ein av deira tilsette er sett i karantene på grunn av mistanke av koronavirus.

– Det er på ingen måte noko dramatikk i dette. Vi har ein tilsett som er sett i karantene i påvente av prøvesvar. Vedkomande er frisk og rask og det er ingen grunn til å tru at vedkomande er smitta, seier einingsleiar Bjørn Olav Tveit for Rosendal skule.

I meldinga til dei føresette kjem det fram at den tilsette for tolv dagar sidan var i kontakt med ein person som i dag har fått påvist koronavirus. Vedkomande, som no sit i karantene, har sjølv ingen symptom og skuledagen på Malmanger går som normalt.

– Vi følgjer retningslinjene frå Folkehelseinstituttet og jobbar i samråde med kommuneoverlege og dei rutinar som eksisterer. Vi har ganske omfattande førebyggande tiltak med handvask og hosterutinar, seier Bjørn Olav.