Ingen skal måtte døy åleine

Kvinnherad Røde Kors Hjelpekorps inviterer difor til kurs i Vaketeneste.

Dei som ønskjer å bidra til å lindre einsemd ved livets slutt, kan melde seg på kurset innan 10. november.

Oddrun Steinsland, som er leiar i den lokale foreininga, har så langt fått åtte deltakarar til kurset som blir haldt på Røde Kors Huset på Husnes, 13. november. Kurset varar i seks timar, og i løpet av desse timane vil deltakarane læra ting som går på etikk og teieplikt, men også få eit innblikk i kva eit slikt verv går ut på.

– Dei vil då lære litt om korleis ein opptrer i forhold til sånt, samt kva ein kan forvente. Det er jo ikkje alltid det går like roleg for seg. Då er det greitt å vite litt om kva ein skal gjere, og kva ein ikkje skal gjere. Oppgåva går ut på å vera tilstades og snakke med personen, og dei skal ikkje gå inn i noko pleie, forklarar Oddrunn.

Absolutt eit behov

Kurset blir arrangert ut frå ein tanke om at ingen skal måtte døy åleine. Ei slik teneste har ikkje Kvinnherad hatt før, og prosjektet er no i startgropa. Vonleg bidreg dette kurset til at ein vil kunne stette dette målet i framtida, og om mange melder seg vil det bli lagt opp til fleire kurs.

– Me tok først nokre rundar på sjukeheimen og med kommunen for å finne ut om det var behov for noko slikt her. Og behov var det absolutt. Det er ikkje alle som har pårørande, og det er heller ikkje alle som har pårørande nærme, seier ho vidare.

Dei som ønskjer å bidra i vaketenesta vil såleis kome inn som ei avlastning for alle involverte. Omsorgsaktiviteten skjer i samarbeid mellom den døyande, pårørande og helsepersonell, kor dei frivillige bidreg ved å vera til stades i den siste fasen av livet.

Det er ikkje eit krav at dei som deltek på kurset skal bli med vidare i aktiviteten, men for å bli med i vaketenesta må ein vera over 25 år.