Ingen smitta etter kontakt med pensjonistbussen

Fredag vart ti kvinnheringar sett i koronakarantene etter kontakt med ein av dei som vart smitta etter nærkontakt med passasjerar på pensjonistbussen.

Turbussen med pensjonistar frå Sør-Rogaland, der 37 av 41 passasjerar vart smitta av korona i løpet av turen, har etterlete seg ein del drypp av smitte i sine hjulspor. I nabokommunen Kvam vart Thon Hotel Sandven stengt etter at tilsette hadde blitt smitta etter at pensjonistane overnatta der i førre veke.

Fredag vart ti kvinnheringar sett i karantene som konsekvens av smittesporing, etter at ein som hadde hatt nærkontakt med koronasmitta frå pensjonistbussen då var blitt smitta. Det var VG som meldte dette fredag morgon, noko kommuneoverlege Glenn A. Opland stadfestar det til Grenda.

– Me har åtte som er nærkontaktar til éin med smitte, men det er no ti som er i karantene som følgje av denne testinga, sa Opland då.

Måndag morgon hadde han ikkje fått melding om påvist smitte hos nokon av dei ti.

– Me har ikkje fått noko positive svar, bank i bordet. Det er heller ingen positive prøvesvar på nokon av dei andre testane som er tatt i Kvinnherad enno, seier kommuneoverlegen til Grenda.