Innbrot i bank og stolen båt

Politiet etterforskar to tjuveri som har skjedd i og rundt Husnes sentrum natt til fredag.

– Vi har motteke to meldingar i dag. Fyrst ei melding frå SR-Bank på Husnes, kor nokon har teke seg inn i banken i løpet av natta og stole med seg ein laptop og ein iPhone. Vi har hatt folk på staden og gjort åstadundersøkingar, seier lensmann Sigurd Børve.

Seinare på morgonen dukka det så opp ei melding om ein stolen båt frå Opsangervatnet.

– Det har vore eit tjuveri av ei Terry 12 fot stor jolle frå Reset-sida av Opsangervatnet. Det er ein kvit båt utan motor med ei blå stripe merka Terry på sida, seier Børve.

Politiet veit ikkje om desse to sakene har samanheng, men synest det er samanfallande at det har skjedd i same tidsrom.

– Vi er interessert i tips frå folk som har vore ute i løpet av kvelden i går og natta som anten kan ha observert båten eller om dei har sett folk i Husnes sentrum, seier Børve.