– Innbyggjarane kan gje seg sjølve ein stor klapp på skuldra

Smitten er på hell og Kvinnherad kommune kjem i den anledning med ein skryt til innbyggjarane.

– Innbyggjarane kan gje seg sjølve ein stor klapp på skuldra for bra handtering av smitteutbrotet. Det er framleis viktig å hugsa på god hoste- og handhygiene, og halda seg heime om ein er sjuk, skriv Kvinnherad kommune i ei oppdatering på sine sider.

Det kjem etter at det vart registrert ni nye smittetilfelle i Kvinnherad i løpet av helga. Som betyr at vi no er oppe i 92 tilfelle av covid-19 sidan utbrotet 12. november.

– I Rosendal er det ingen nye, medan noko familie til elevar på Husnes og Halsnøy er smitta i løpet av helga, skriv kommunen.

Dei skriv også at hurtigtestane no er flytta innandørs ved helsesentera då dei ikkje toler minusgradene.

– Plakatar om kvar ein kan finna desse vil hengja ved dei ulike helsesentera, skriv kommunen.