Innfører nasjonale reglar for ventekarantene

På bakgrunn av anbefalingar frå Helsedirektoratet og FHI innfører departementet no nasjonale reglar for personar i ventekarantene.

Karantene er viktig for å avgrensa smittespreiinga og halda samfunnet ope. I dag varierer dei lokale anbefalingane om ventekarantene, og ordninga vert praktisert ulikt mellom kommunar. Det gjer regjeringa noko med no.

– Ein kan vera smitteberande sjølv om ein ikkje er sjuk. Karantene er difor eit av dei viktigaste verkemidla vi har i kampen mot koronapandemien. Vi ser at anbefalingane om ventekarantene varierer mellom kommunar og bydelar. For å gjera ordninga meir oversiktleg og enklare å forstå innfører vi difor nasjonale reglar for ventekarantene, seier helse- og omsorgsminister Bent Høie i ei pressemelding.

I dag er det kommunane sjølv som gir anbefalingar om kven som skal i ventekarantene. Frå og med måndag 29. mars vil det følgja covid-19-forskrifta at personar som deler bustad med eit husstandsmedlem som er i smittekarantene skal vera i ventekarantene.

Ventekarantenen er over når:

* Husstandsmedlem i smittekarantene har testa negativt for koronatest første gong, eller seinast når karantenetid til den som er nærkontakt er over.

* Personen i ventekarantene testar negativt på PCR-test teke tidlegast tre døgn etter husstandsmedlem sin siste nærkontakt med ein stadfesta smitta person.

Ventekarantene gjeld ikkje for personar som ved godkjent laboratoriemetode kan dokumentera at dei i løpet av dei siste seks månadane har hatt korona. Den gjeld heller ikkje for personar som er vaksinert mot korona, eller dersom husstandsmedlem i smittekarantene er vaksinert.