Innstilte ferjer og stengt veg grunna filminnspeling

Innspelinga av filmen "Torden" fører til trafikale utfordringar onsdag 28. juni. Fleire ferjer er innstilte, og vegen gjennom Rosendal sentrum kan bli heilt stengt.

Innspelinga av superhelt-filmen "Torden" ("Mortal" på engelsk") er i full gang. Etter å ha filma i Odda og langs Sørfjorden, er troppene no flytta til Kvinnherad. I dag har det blitt filma både i Matre og på gamle Løfallstrand kai. No melder Norled at onsdag 28. juni så vil to rundturar på sambandet Årsnes-Gjermundshamn utgå. Det gjeld avgangane klokka 08.00 og 09.00 frå Gjermundshamn og avgangane 08.30 og 09.30 frå Årsnes. Så her er det om å gjera og planleggja på nytt for dei som hadde tenkt seg denne vegen på den tida.

Filmgjengen opplyser at dei skal fylla opp ferja med statistar, og treng minst éin campingbil, eit par turmotorsyklar - gjerne med bagasje, nokre arbeidsbilar, medan resten kan vera vanlege personbilar.

Dei fortel også at dei skal filma på og ved Skåla bru onsdag føremiddag, og at vegen vil bli stengt i samband med dette. Som kjent finst det ingen omkøyringsvegar gjennom Rosendal som er opne for ålmenn ferdsel.

			.