Inntil 38 av 80 tilsette må gå ved Palfinger i Ølve

Det stadfestar dagleg leiar ved fabrikken i Ølve, Georg Askvik, til Grenda.

Palfinger sendte onsdag ettermiddag ut ei pressemelding der dei varsla «strategiske avgjerder i cruisemarknaden». Som mange frykta, råkar det fabrikken i Ølve.

– Me har eit styrevedtak på inntil 38 tilsette, men skal i forhandlingar med fagrørsle og tilsette, og det kan koma innspel som påverka talet som må seiast opp, seier Askvik.

Det er livbåtar til cruise me har i ordre i Ølve, pluss vedlikehald av fritt fall-livbåtar. Det siste går framleis vidare som eit spor på sida av båtbygginga, seier leiaren.

Han varslar at nedbemanninga blir jamt fordelt på alle avdelingar, og ned til eit nivå som gjer at dei kan koma i mål med dei kontraktane dei har, og samstundes held fram med å produsera med effektivitet.

– Me har prøvd alle midlar for å sleppa, men no er det såpass svart i andre enden at det ikkje var råd for oss å gjera noko anna. Leveringstidene til våre kundane våre er strekt, og me har for høg bemanning slik det er no, seier Askvik, som vart kasta inn i leiarjobben for verftet i Ølve i mars.

Ved tilsetjinga sa han tydeleg at han med si bakgrunn frå familiebedrifta i Askvik på Os, var båtmann.

– Eg er framleis ein båtmann, og ynskjer at det skal haldast fram å produsera båtar i Ølve og i Norge. Me trur at alle er innstilte på å gjera det beste ut av dette, og at det framleis skal produserast båtar i Ølve. Det er Covid-19 som øydelegg for oss denne gongen, og eg er redd det tar tid før cruisenæringa er oppe att, sluttar Askvik.