Jul i Rosendal er avlyst

Det var ein snufsande arrangør som i slutten av august meldte om at også årets Jul i Rosendal diverre blir avlyst.

Grunna alle pålegg og restriksjonar som framleis gjeld, såg dei ingen moglegheit for å kunne lage marknaden slik dei ønska.

– Vi i nemnda ser framover og gler oss til 2022, der vi vil gjera alt for å presentere ein marknad slik vi vil ha han. Hald ut og følg med oss vidare. Vi vert ikkje vekke, vi har berre ‘marknadspause’, opplyste nemnda på Facebook 28. august.

Innlegget vart markert med tårevåte emojiar, og møtt med forståing i kommentarfeltet.

Marknaden vart første gong arrangert i 2009 av ein driftig gjeng som ville «gjenskape den gode julestemninga». Denne julestemninga har trekt til seg enorme mengder små og store, samt mange utstillarar. Samanlagt har det vore stinn brakke på marknadsplassen, som dei siste åra har haldt til i parkeringshuset i Varehuset Rosendal.

Julemarknad åkkesom

Det vil likevel bli råd å finne julestemning i Kvinnherad også i år, og dessutan i god tid før julaftan. 6. september kunngjorde Halsnøy kulturhus at dei vil arrangere julemarknad den 20. og 21. november. Meir informasjon vil dei koma attende med, men oppmodinga er klar:

«For å skape julestemning på Sæbøvik inviterer Halsnøy Kulturhus til julemarknad. Har du noko du vil stilla ut på marknaden? Ta kontakt med Liv for å melda deg på!»