Julekuler i alle fasongar

Med julesong og glede vart årets Jul i Rosendal-utstilling opna av kunstnarane sjølv.

Etter at skulekameratane i Omvikdalen barnehage hadde henta fram julestemninga med sine fine songar, var det tid for høgtideleg snorklypp og offisiell opning av årets juleutstilling i 2. etasje.

Utstillinga har i år julekuler som tema, og kunstnarane hadde verkeleg vore kreative i arbeidet. Borna frå dei fleste klassane på skulane Mauranger, Malmanger og Omvikdalen, i tillegg til barnehagane i dei same bygdene hadde bidrege, og viste torsdag stolt fram det dei hadde laga.

– Sjå her. Desse har vi laga. Vi har klipt ut strimler frå ulike blad og sydd dei saman til desse julekulene, var dei ikkje fine? Spør kameratane Nicholas og Kristian frå 3. klasse.

Svaret på det er eit rungande ja. Til liks med alle dei andre flotte og fargerike julekulene som no heng utstilt oppe i 2. etasje.