Kan bli ein årleg festival
Frå fleire hald vert det allereie teke til orde for å skipa til ein årleg skutefestival i Rosendal.
Laurdagens 140-årsfest for «Loyal» var så vellukka at fleire går langt i å lova at det vert ein tradisjon.
– Det må bli eit årleg arrangement med skutefestival i Rosendal. Og midten av september passar perfekt, sa «Loyal» sin nye eigar, Stein-Arve Olsen frå Florø.
Artikkelen held fram under annonsen.
Knut Førland i Stiftinga Folgefonnsenteret likte at det aula med liv på kaiområdet.
– Dette gav meirsmak, og ein skutefestival er noko fartøybygda vår fortener. Alle som stilte opp på dugnad fortener stor takk, ikkje minst «Gurine»-gjengen, Asbjørn Soltveit, Håkon Uppheim, Svein Jarle Mehl og Gunvald Friheim. Rosendal har verdas beste dugnadsfolk, helsar han. Førland kan elles røpa at permanente bord og stolar til å ha på kaiområdet er bestilt.
På Rosendal bubilparkering var det heilt fullt med ca 110 bilar. Og på dansen i samfunnshuset vart det selt 214 billettar, om lag halvparten til bubil-gjester.
– Vi er utruleg godt nøgde. Det var svært god stemning og god musikk, seier Arvid Nes i RT fotballgruppa som stod bak.