Karina hyllar gamle stjerner

Karina Opdal og Alex Hutton kjem for å halda konsert i kinosalen på Husnes fredag 19.januar.

– Ella, Billie, Doris, Marlene, Sarah, Marilyn, Nina, Monica...høgt heng dei, og enno blinkar dei! Med sine eineståande stemmer og vidunderlege sceneframføringar har desse damene vore publikum sine yndlingar gjennom mange år. Og for unge syngedamer har dei utvilsamt vore ei stor kjelde til inspirasjon, heiter det i pressemeldinga frå Husnes Jazzklubb som er arrangør saman med Kulturhuset Husnes.

Karina Opdal med vener ønskjer å gleda publikum og hylla desse stjernene med kjende, musikalske perler. Karina frå Sunde har med seg jazzpianisten Alex Hutton frå London.

– Han er ein glitrande musikar som Karina har jobba med sidan 2003, melder Jarle Mehammer i jazzklubben.

Den musikalske kvinnheringen har også med seg Morten Stang Koppang på trompet og Edvard Mjanger på bass.

– Det ventar kanskje også nokre lokale overraskingar, lokkar Mehammer.