Kåringssjå på gardane

Det årvisse kåringssjået i ridehallen i Rosendal blir i år erstatta med gardskåring.

– Me dommarane skal frå gard til gard og gjera kåring hos dei som melder på dyr, stadfestar Bjarne Berge i Kvinnherad Sau & Geit.

Han hadde gledd seg til samling i ridehallen på søndag

– Det har vore ein kjekk og sosial sak for sauebøndene, så det er synd det ikkje blir i år. Men me skal ta smittevernet på alvor, me også, og så satsar me på at det blir klassisk kåringssjå neste haust.

Gardskåring betyr at dommarane reiser rundt til alle som melder seg på.

– Det byrjar i Nordrepollen klokka ni på søndag morgon, så går det slag i slag til me samlar ein væring til kåring på Helland.

Det er Norsk Kvit Sau som blir kåra der. Sauer, verar og lam som stiller til kåring har bak seg ein fin sommar i fjellet.

– Fjellbeitet i år har vore veldig bra. Sankevêret, derimot, har vore dårleg, kommenterer Berge.

Om beite og vêr vekslar, er det noko som tydelegvis ikkje endrar seg.

– Prisen på lammekjøtet er det same no som på 80-talet, sluttar Berge.