Kjeet Vilde stakk av frå slaktebilen – får behalda livet

Då slaktebilen kom køyrande gjorde vesle Vilde det einaste rette; ho stakk av. Dermed er ho sikra eit langt liv.

Dyrehistorier er alltid godt avisstoff. For nokre dagar sidan oppdaga Grenda eit artig bilete på Instagram, og tok kontakt med gardbrukar Øyvind Utne for å få historia bak. Då skal vi tilbake til førre måndag. Slaktebilen kom til Nes i Rosendal og henta ei bøling med lam og kje som skulle sendast til slakt. Opplastinga gjekk utan problem, og bilen fortsette til andre gardar. Men etter nokre timar fekk Øyvind Utne, som var på jobb, telefon frå sjåføren.

– Han var noko oppkava og sa at eine kjeet hadde stukke av under omlasting, og han fekk ikkje tak i det igjen, fortel Øyvind Utne.

Etter arbeid ville han sjølv kikka etter kjeet. Det var fort gjort.

– Kjeet stod på muren utanfor kyrkja. Ho såg roleg ut, så eg stressa ikkje og køyrde heim til middag, opplyser Øyvind.

Berre på leik

Etter måltidet tok han turen til Bjørke, der resten av flokken beitar, og hadde då selskap av sonen Peder og ein av hans kameratar. Planen var å henta mora til kjeet, køyra ned til kyrkja, og bruka mora som lokkemiddel.

– Det fungerte, for kjeet kom med ein gong, og vi fekk ho opp i tilhengaren utan vanskar. Men ho hadde tydelegvis kost seg ved kyrkja, for ho hadde gått att og fram på kyrkjegardsmuren, og i tillegg teke nokre rundar rundt bautaen. Det verka som at det berre var leik for ho, smiler Øyvind Utne.

Nokre dagar seinare får Grenda vera med opp til beitet og helsa på rømlingen. Øyvind og Peder har lagt opp til ein liten spøk, sjølv om geitene neppe er veldig gode til å lesa norsk.

– Du ser Peder har på seg to skyggehuer, og den øvste står det Fatland på. Men viss geitene ikkje kjem då, byter han til den det står Felleskjøpet på, humrar Øyvind.

Fyrst ligg flokken på fem litt avventande, kanskje skremt av Fatland-lua. Men då Øyvind lokkar på «Lille Vilde», for Vilde er namnet på tøffingen, byrjar dei å lea på seg. Og når Peder går fram med eit spann fullt av godsaker, kjem kvintetten joggande for å forsyna seg.

Kje-ribbe

Øyvind kan då røpa at Vilde, som vart født i mars, er sikra eit vonleg langt liv.

– Ja, sjølvsagt. Når ho har klart det kunststykket å stikka av frå slaktebilsjåføren, så må ho få ha livet i behald, så lenge helsa held, seier han, og reknar med ei geit kan bli om lag ti år gamal.

Med til Bjørke er også Peder sine systrer, Amalie og Cecilie.

– Kva synest dåke om at Vilde får leva? spør Grenda sin utsendte.

– Bra, svarar jentene nærast i kor.

Kjøtet frå kjea og lamma som ikkje var så lure som Vilde, skal seljast privat. Øyvind Utne kan nemleg fortelja at kje-ribbe har blitt ein trendrett, og det er populært å kjøpa kjøt for å laga den retten. I tillegg er det mange med utanlandsk bakgrunn som likar geitekjøt.