Klart det blir Pride-arrangement!
Etter å ha lese i avisa at det ikkje skulle bli arrangert Pride i Kvinnherad dette året, tok Hogne Gjuvsland med fleire saka i eigne hender. Laurdag 3. juli vert difor Pride markert i Kvinnherad, med appell, tog, musikk og fest i Husnes sentrum.
– Vi hadde møte i går kveld klokka 18, og då la vi ut arrangementet på Facebook, fortel Gjuvsland over telefon onsdag føremiddag.
Då hendinga enno er i startgropa, er det ikkje alle ting som er på plass når Grenda slår på tråden. Mellom anna er det uvisst kven som skal halda appellen. Kor denne vil finna stad er likevel bestemt, og arrangementet vil byrja ved paviljongen i Husnesparken. Det er fleire alternativ på blokka, og det vil bli annonsert kven som vil halda appellen så snart arrangørane veit kven det blir.
Artikkelen held fram under annonsen.
– Etter appellen skal vi gå i tog. Då går vi gjennom parken, opp Heiamyro inn Sentrumsvegen og bort til Torgplassen, fortel Gjuvsland som lovar pomp og prakt og mykje gøy, til eit høveleg lydbilete.
Arrangørkomiteen har sjølvsagt ei eiga gruppe som er ansvarlege for musikken, og spelelista er både god og i emning, skal ein tru talspersonen.
Både toget og markeringa i sin heilskap skal passa for både unge, vaksne og eldre, og arrangørane inviterer alle som har lyst til å bli med på festen.
Nokon må gå føre
– Det er mange born som har gledd seg til å gå i Pridetog, og når det framleis er mange som blir straffa for å vera homofil, veit ein at det er vanskeleg å stå fram mange stader. Slik er det også her i Kvinnherad, og nokon må gå føre og vise støtte til bodskapen om at alle har retten til å bestemme sin eigen skjebne.
Ein må ikkje tenke at dette er ei markering som er for dei homofile, for her kan alle delta, held Gjuvsland fram. Alle menneske er like mykje verd, uansett kva legning dei har. Arrangementet blir kjempekjekt, lovar han, og håpar at mange tar turen for å delta på markeringa.
På melding frå ordføraren vart det under oppstartsmøtet for Pride Kvinnherad 2021 stadfesta at arrangementet hadde full støtte i kommunen.
– Dette er vi for! helsa Hans Inge Myrvold.