Klart for turorientering og åsatrim på Halsnøy

Halsnøy O-lag og Fatland Aktivitetshus har saman lagt ut postane til årets turorientering og åsatrim på Halsnøy.

– Postane er no komne ut i terrenget, og frå fredag 1. mai er konvoluttane til turorienteringa med klippekort, kart og informasjon å få kjøpt i butikk, skriv dei to laga i ei pressemelding.

Frå same dato er det også høve til å starta på ein ny sesong i åsatrimmen.

– På grunn av koronaviruset er det svært viktig å halda avstand og ta omsyn til andre turgåarar. Turorienteringspostane har derfor i år bokstavkodar som må skrivast ned med tynn tusjpenn på klippekortet. I åsatrimmen brukar du stifteklemmer på toppen, men ha gjerne med eingongshanskar eller antibac. Eller bruk ein stein eller eit trestykke mellom handa og stifteklemma når du stemplar, står det å lesa i pressemeldinga.