– Klasseskilje i organisasjonen Kvinnherad kommune

Viser til dei store skilnadane på løn for tilsette i Kvinnherad kommune, som Kvinnheringen informerte om i avisa 18.9.20. Viser også til uttale frå representant i kommunestyremøte førre veke (referert i Kvinnheringen); «Kanskje vi no skal begynna å sjå på personalpolitikken vår?»

Ja, kanskje det. Med 100 tilsette kvar dag- over år, som ikkje er på jobb- som er sjukmelde, så bør dette i alle fall vere eit tydeleg nok teikn på at det er noko gale i organisasjonen. Eg skreiv i september 2018 eit langt lesarbrev vedkomande forhold som gjaldt tilsette i Kvinnherad kommune; «Den viktigast reiskapen kommunen har». Mange tips der, for kva ein kan ta tak i. Og ja, dette er eit tema som politikarane i kommunen no snart må ta på alvor – både for dei tilsette sin del, og for kommunen som heilskap, inkludert sjølvsagt kommunen sin økonomi.

Men det har tydelegvis vore vanskeleg for politikarane å ta tak i det. Og det forstår eg. Kvinnherad kommune har ein ukultur når det gjeld korleis tilsette i utøvande teneste vert «sett på» av leiinga. Denne ukulturen har sett seg fast, og er blitt enno verre dei siste åra. Om ein ikkje er på innsida av organisasjonen, så ville ein aldri trudd korleis det kan vere.

Tilsette på golvet vert i det heile lite «sett», både av leiinga, av tillitsvalt-apparatet og av vernetenesta. «Ikkje kom her og kom her»- når tilsette kjem med innspel. «Gå tenesteveg» om ein ønske å seie noko – dvs. at det er lang veg frå tilsett på golvet til dei som kan gjere noko med innspelet. Og det blir «kviskreleiken»; at innspelet naturleg nok endrar seg heilt gjennom dei mange leiarledda, har løyst seg opp på vegen, eller ikkje bringa vidare i det heile tatt.

Omgrep som Styringsrett og Personalsak vert brukt av leiinga og av personalkontoret. Dette innbyr ikkje til engasjement og deltaking, og kan i staden bidra til likesæle og håpløyse – ikkje nokon vits å bry seg, best å late vere. Tenk om leiarar i administrasjonen i Kvinnherad kunne hatt same haldninga som ein kan lese at ein ung, flott leiar i ei blomstrande verksemd i Kvinnherad har; «Eg har alltid hatt eit brennande engasjement for jobben og for kollegane mine. Mi hjartesak er utan tvil personalpolitikk, for skal ein koma seg nokon stad her i verda, er det heilt avgjerande å få med seg kollegane sine, …..» (sitat frå intervju i Kvinnheringen 1.april 2020). Det er nokre månadar sidan eg las dette, men det har festa seg. Og det er så rett. Så her, Kvinnherad kommune, har de noko å styre etter!

I eit lesarbrev førre veke, les eg at Administrasjonsutvalet «er gjenoppliva». Det er bra, i tilfelle dette utvalet ikkje har vore i funksjon. Men korleis kunne ein i tilfelle, late dette vere ute av funksjon, når det er dette utvalet som har det øvste ansvaret for personalet ?

I høve ei alvorleg varsling vedkomande personal, som eg sende til leiinga i kommunen for nokre år sidan, så føreslo eg å også sende denne til Administrasjonsutvalet, då det var dei som hadde vedteke den aktuelle ordninga, der leiarar i kommunen hadde svikta. Eg fekk då «så øyrene flagra» frå personalkontoret, og varslinga vart ikkje sendt til utvalet. Det er bra at Administrasjonsutvalet no kjem i aktivitet igjen, og som det står skrive i sistnemnde lesarbrev; at politikarane «vil og skal, ha meir fokus på arbeidsgjevarpolitikken.»

Der er store skilnadar i løn mellom tilsette i direkte tenesteutøving, og leiarar. Det kan vi lese i artikkelen i Kvinnheringen sist fredag. Og gapet har utvikla seg- denne galne vegen. Uttalen frå personalleiar synar at for dei lågast løna, dei ufaglærte, så er det enno verre enn den låge gjennomsnittsløna som Kvinnheringen opplyse om. Dei hovudtillitsvalte er nøgde med at leiarane har høg lønn. Nei, eg blei ikkje overraska over det. Dei tillitsvalte er inne i varmen hjå administrasjonen, har lokalisert seg på Rådhuset og drikk kaffi med leiarane.

Når det gjeld kontakten med medlemane, så er ikkje denne stor; sjeldan og aldri medlemsmøte, bidrar ikkje til å skape engasjement blant dei organiserte, hentar ikkje inn- og bringe engasjement frå medlemane sitt syn vidare til leiinga. Ikkje vanleg å snakke med medlemane, las eg for ei tid sidan, at ein hovudtillitsvalt uttalte. Og det trur eg stemmer. Når det gjeld vernetenesta, så er dette det same. Dei er også inne i varmen hjå administrativ leiing.

Mi oppmoding til både tillitsvalt-apparatet og vernetenesta er; kom dykk ut av Rådhuset og lokaliser dykk blant dei de skal representere! Få litt «liv i leiren», slik at det kan skje noko. Slik det er no, så dekker de over både problemstillingar og utvikling. Og ein ting til. Slutt å «sjå ned på» personar som ikkje har den faglege utdanninga. Verdset dei høgt – og vis det, for dei kan gjere ein minst like god og samvitsfull jobb for kommunen, som andre med papir på kva dei skal kunne. Det er ikkje alle som er skapte for – eller ønskjer ei teoretisk utdanning, og dei må også kunne halde hovudet høgt i organisasjonen Kvinnherad kommune – og ikkje minst; dei også må ha rett på ei løn å leve av. Kvinnherad kommune er ei IA-bedrift (Inkluderande Arbeidsliv), korleis utøver kommunen dette ansvaret?

Eg var tilsett i kommunen i 23 år. Mange gode år, nydelege kollegaer, og nokre leiarar som var utruleg flinke. Dei fleste av desse leiarane slutta diverre i kommunen og fann seg anna arbeid. Og ikkje minst har eg hatt kontakt med mange flotte personar, som eg har vore så heldige å fått vere i teneste for. Men utviklinga i høve personalsituasjonen har dei siste 10-15 åra berre blitt verre og verre. Så i vinter valte eg å pensjonere meg, ved første høve (62 år). Og eg må seie det er heilt fantastisk, å ha fått Kvinnherad kommune som arbeidsgjevar vekk frå skuldrane mine.

Ein kommuneorganisasjon skal etter lova vere gjennomsiktig. I dette lesarbrevet har eg bidratt med ein del i høve dette. Eg avsluttar her, men vil kome tilbake med fleire tema etter kvart som det aktive pensjonist-tilværet tillét dette.

 

Av: Møyfrid Kristoffersen, sosionom/AFP-pensjonist

Uskedalen 22.september 2020

 

Dette lesarbrevet inneheld påstandar som utløyser rett til samtidig imøtegåing hos både personalansvarleg, verneombod og hovudtillitsvalt i Kvinnherad kommune, noko Grenda har kontakta dei om. Kvinnherad kommune vel å nytta seg av den retten.

Red.

 

– Kan ikkje kommentera personalsaker

Kommunen ynskjer ikkje  å avgrense tilsette eller tidlegare tilsette i å uttale seg om organisasjonen på et generelt plan. Vi vil likevel påpeike at vi ikkje deler same oppfatning av verkelegheita som forfattaren av lesarinnlegget. Kommunen ynskjer ikkje, og kan heller ikkje kommentere personalsaker i media.

 

Av Ragnhild Bjerkvik, kommunedirektør.

 

[gravityform id="11" title="true" description="true"]