Kong Harald er død

"Det er med djup sorg vi meddeler at Hans Majestet Kong Harald i dag gjekk bort. Kong Harald sovna stille inn på Rikshospitalet fredag 28. august, klokka 06.35", skriv Kongehuset.

Kong Harald V vart født 21. februar 1937, som den yngste av tre sysken. Han gifta seg i 1968 med Sonja Haraldsen. Han overtok som konge 17. januar 1991, då Kong Olav V døydde.

Kong Harald vart innlagt på sjukehus 17. august i år, etter ei legeundersøking. Etter det fekk han kortisonbehandling for hemolytisk anemi.

På søndag vart det meldt at situasjonen hadde forverra seg. Slottet opplyste då at kongen vart behandla med antibiotika grunna ein infeksjon med bakteriar i blodet. Torsdag morgon vart det gjort kjent at situasjonen var svært alvorleg.

Kronprins Haakon Magnus (født 1973) har no overteke trona og blitt til Kong Haakon VIII.

I Kvinnherad

Medan dronning Sonja har besøkt Kvinnherad mange gonger, både offisielt og uoffisielt, har Kongen vore sjeldan å sjå på våre kantar. Han har nok vore om bord kongeskipet på forbiseglingar, truleg sist i 2024 då kongeparet skulle på offisielt besøk til Ølen.

Som kronprins og kronprinsesse har paret vore i Kvinnherad i alle fall to gonger. Fyrste gong i mai 1969 med sine danske kollegaer. I mai 1990 hadde dei med seg storhertug Jean og prinsesse Josephine-Charlotte av Luxemburg.

I juni 2005 var det norske kongeparet på privat og uoffisielt besøk i Rosendal, og gjekk då på tur i baronihagen.