– Køyrer du på eit dyr så skal du melda frå

Politiet kjem med ei klar oppmoding til dei som skulle vera så uheldige å køyra på eit dyr; – Meld frå til eigar eller oss.

Tysdag 7. september skreiv Grenda om eit knippe bønder, som har sauar gåande i Fjellhaugen, som denne sommaren har merka konsekvensane av auka trafikk og turisme i området.

Blant dei Kathrine Haugland frå Seimsfoss som i sommar fann ein av sauene sine stygt kvesta etter ei påkøyrsle, utan at nokon hadde meldt frå.

Haugland meldte saka til politiet, som no kjem med ei klar oppmoding til sjåførar som skulle vera så uheldige å køyra på eit dyr.

– Gjer ein det, så må ein ringa og melda frå. Anten til eigar av dyret eller til oss, seier politioverbetjent Torgeir Fosse i Kvinnherad lensmannsdistrikt og legg til:

– Vårt inntrykk er at folk er flinke til å melda frå ved påkøyrsel av hjort, men når det kjem til husdyr og sau, så er ikkje folk så flinke. Viktigheita av at ein sikrar seg at dyr ikkje lir unødig, og at eigar får vita om det, må overstiga frykta for at ein skal få kjeft, seier Fosse, og legg til at det er forsikringsselskapet som skal ta kostnaden ved eventuell erstatning.