Krev dei mest utsette raspunkta sikra innan 10 år

Fleire sentrale Sp-politikarar på Vestlandet går no ut og krev rassikring høgare opp på den politiske agendaen.

I eit felles forslag til programbehandlinga på landsmøtet i Senterpartiet krev dei at staten skal forplikta seg på å sikra alle dei punkta på vegane med høgast rasfaktor i løpet av ein 10-årsperiode.

– Vi vil ha ein forpliktande plan som gjer at vi om 10 år har sikra alle strekningane med høgast rasfaktor, seier 1. kandidat for Sogn og Fjordande Sp, Erling Sande i ei pressemelding.

Ei av dei som også står bak framlegget er stortingskandidat for Hordaland Sp, Kjersti Toppe.

– Vi ynskjer at folk skal kunna ferdast trygt på vegane våre. I tillegg til sjølve faren for å bli råka av ras og skred, lev mange med frykta i kvardagen. Det er i stor belastning å måtta senda skulebarn og familie langs rasfarlege vegar til skule eller arbeidsplass, seier Toppe og legg til:

– Ikkje minst er næringslivet avhengige av føreseielege rammevilkår. Dei må vita at dei får varer til og frå verksemda si, og at arbeidarane ikkje står på andre sida av ein rasstengd veg.

Skal denne forpliktande planen bli realisert, slik Sp-politikarane legg opp til, vil det føra til at potten til rassikring i statsbudsjettet må doblast.

– Ei slik opptrapping vil vera det største løftet for rassikring som nokon gong er gjennomført, seier Toppe og Sande i pressemeldinga.