Kritiserte kort tidsfrist

Jostein Saghaug (MDG) reagerte på at saklista til måndagens ekstraordinære kommunestyre vart sendt ut berre nokre dagar før.

Onsdag 25. august fekk kommunestyrerepresentantane eit varsel om at det ville bli halde eit ekstraordinært møte på Teams måndag 30. august. Saklista vart ettersendt fredag føremiddag. Då møtet starta, forklarte ordførar Hans Inge Myrvold (Sp) hastverket med at sakene måtte avklarast no på grunn av nokre tidsfristar. Men Jostein Saghaug (MDG) tykte ikkje det var haldbart.

– Eg opplever det rett og slett som kritikkverdig at vi får innkalling på fredag til eit møte som skal haldast på måndag. Det er dessutan tre saker som kvar for seg er viktige. Som folkevalde fortener vi betre. Det vert vist til tidsfristar, men eg forstår ikkje at desse tidsfristane ikkje har vore kjente for ordførar for éi veke sidan, argumenterte han.

Spørsmål og svar

Saghaug syntest det også var kritikkverdig at møtet vart gjennomført føre dataskjermane, sidan det trass alt er lov med fysiske møte. Ordføraren registrerte innspela, men viste til at kommunelova opna for å hasteinnkalla kommunestyret til fjernmøte. Kritikken om tidsfristar svarte han ikkje på.

Seinare i møtet etterlyste Saghaug høve til å stilla ordføraren ulike spørsmål, noko som stod oppført som eige punkt på saklista. Myrvold svarte at han ikkje la opp til ein slik runde sidan det var eit ekstraordinært møte. Dessutan påpeika han at dette vart opplyst om før kommunestyret godkjente saklista med denne endringa.