– Kunden vil ikkje merka noko

Tilbords i Rosendal vil halda fram som normalt, og kundane vil ikkje merka noko til kjedekonkursen som vart kjent måndag.

– Vi vil drifta butikken som vanleg. Den einaste forskjellen er at vi ikkje kan kjøpa varer frå Tilbords-grossisten. Men det er varer vi kan handla inn frå andre leverandørar, seier butikkeigar Atle Nygård i Tilbords-butikken som ligg øvst i Varehuset Rosendal.

Det er berre tre månadar sidan eigarane av Kitch’n kjøpte opp Tilbords-kjeda. Men måndag morgon valte dei å slå kjeda konkurs. Noko som beinveges førte til ei uviss framtid for 105 butikkar. Men no kan Atle Nygård fortelja at sjølv om kjedekontoret er konkurs, så vil ikkje det få noko dramatiske konsekvensar for butikkane rundt om i landet.

– Kundane våre vil ikkje merka noko til dette no i starten. Og det er i dag to eller tre seriøse aktørar som ynskjer å overta kjeda. Vi har tru på at det kjem ei løysing fort. Vi er optimistar og satsar på at bustyrar etter konkursbuet får seld det, slik at vi er oppe å går som normalt ganske kjapt, seier Nygård.