Kvar innbyggjar kasta i snitt 451 kg avfall

I 2018 kasta kvar innbyggjar i SIM-kommunane om lag 451 kg bos kvar. Ein auke på 3,8 prosent samanlikna med 2017.

Av dei 451 kg med avfall, kasta kvar og ein i snitt 57,8 kg bioavfall, 32 kg papiravfall og 15 kg farleg avfall.

– Me har hatt ein liten nedgang i avfallsmengdene i nokre år no. Både i 2015, 2016 og 2017 gjekk mengdene avfall frå hushald ned, men fjoråret viser at mengdene aukar att, seier ansvarleg for plan, innkjøp og kommunikasjon Janne Hillersøy i SIM i ei pressemelding.

 

400 tonn plast og mykje mat

Totalt har SIM samla inn om lag 400 tonn plastemballasje i 2018. 300 av desse kom frå den nye innsamlingsordninga, der SIM hentar plastemballasje på lik linje som papir, bio og rest.

– Det er bra. Plasten me samlar inn vert sendt til gjenvinning via Grønt Punkt Norge, og mesteparten av det ein får inn vert gjenvunne til nye plastprodukt, seier Hillersøy.

SIM har nyleg gjennomført ein plukkanalyse av avfallet til innbyggjarane i sine kommunar. Ein analyse som viser at abonnementane generelt sett er flinke til å sortera, med eitt unntak.

– Det hamnar mykje matavfall i restavfallet. Feilsorteringa viste heile 25 prosent bio i restavfallet. Det er synd. Dette er avfall som kunne blitt gjort om til kompostjord. I tillegg er det ikkje bra at me kastar så mykje mat, seier Hillersøy.

SIM har også vore med i ein matsvinnsanalyse gjennom Miljødirektoratet som viste at av alt matavfallet som vart kasta, var 41 prosent rekna som matsvinn.

– Det vil seia at det er mat som hadde vore etande. Noko som sjølvsagt ikkje er bra, sluttar Hillersøy.